Momentos en cor

Sostén o Nobel colombiano García Márquez que “a vida non é a que un viviu, senón a que un recorda e como a recorda para contala”. Con todo, ás veces, para lembrar con exactitude momentos ou lugares especiais, recorremos á axuda de aparellos tecnolóxicos (cámara fotográfica ou móbil por exemplo). Iso para a grande maioría. Porque no caso de estar dotados de talento artístico, pictórico como tal, resólvese a situación tirando de recursos propios. Isto é o que lle acontece a Maribel Garrote, cuxas aptitudes innatas foron moldeadas por dous mestres da pintura: Segura Torrella e González Collado. E o resultado está á vista no Torrente Ballester até o día 22. Dos pinceis da pintora van aparecendo relaxantes e envolventes formas. Eses momentos inesquecíbeis plasmados en paisaxes, currunchos, lembranzas familiares, mares de auga pero tamén de oliveiras, romarías, obxectos…Ou sexa, momentos con cor para compartir. Non os perdan!